Ingredjenti

600ml ħalib
100g zokkor
50g cornflour
2 isfra tal bajd
essenza tal-vanilla

Metodu

1. F’ kazzola poġġi l-ħalib flimkien maz-zokkor u l-essenza tal-vanilla. Qiegħed fuq nar moderat.

2. F’ bieqja poġġi l-isfar tal- bajd u żid ftit ħalib. Żid il-cornflour u ħawwad tajjeb sakemm din tinħall.

3. Meta t-taħlita tal-ħalib tibda tagħli, baxxi n-nar u bil-mod ibda żid il-cornflour filwaqt li tħawwad il-ħin kollu. Triq tagħmel ħafna attenzjoni biex il-krema tiġi lixxa – dik lib l-Ingliż tissejjaħ ‘smooth’.

4. Poġġi din il-krema ġo l-forma ta’ l-għaġina msajra. Trid tħalli l-krema tiksaħ għal kollox qabel ma tqiegħed il-frott fil-wiċċ.

NOTA Jekk trid tagħmel krema taċ-ċikkulata żid 40g trab taċ-ċikkulata -cocoa powder.

Huwa mportanti ħafna li tifhem tajjeb ir-riċetta, li tkun se tagħmel u taqra u terġa taqra il-metodu, biex tkun żgur li fhimt kollox. Dan għaliex huwa mportanti li timxi mar-riċetta u l-metodu għaliex inkella se jkollok ħafna żbalji u żgur li l-għaġina ma tigiex tajba.

Huwa dejjem l-aħjar li l-għaġina tkun friska. Imma tista tagħmel din sa jumejn qabel. Tista tiffriża l-għaġina però mportanti li tagħmel tabella fuq il-borża bl-isem ta’ l-għaġina u data li tkun għamiltha. Għaġina li tinżamm għal żmien twil fil-friża timtela bil-kristalli ta’ l-ilma u titlef ukoll il-kulur.

Ingredjenti

480g dqiq plain
300g margarina
120g zokkor
bajda
ftit qoxra tal-lumija maħkuka

Metodu

1. Ġo skutella għarbel id-dqiq. Trid tgħarblu għal aktar minn darba. Int u tgħarbel id-dqiq trid iżżomm il-passatur kemm tista ‘l fuq. Din biex iddaħħal kemm tista arja, int u tgħarbel.

2. Żid il-margarine. Jekk se tuża l-mixer, biex tagħmel l-għaġina; allura trid tuża l-ganċ. Tista tagħmel din l-għaġina b’ idejk.

3. Ħaddem sewwa bejn idejk il-margarine u d-dqiq, sakemm it-taħlita tiġi qisha ramel safrani. Ma tridx tibqa tidher il-margarine. (ara ritratt 1)

4. Ġo bieqja żgħira ħallat il-bajda flimkien maz-zokkor u l-lumi. Ħallat sew. Żid din it-taħlita ma’ dik tad- dqiq u margarine. Ħallat sew u għaqqad biex itfforma għaġina. Hija mportanti ħafna li tħaaddem biss għal ftit minuti.

5. Jekk tkun qed tuża l-mixer naddaf tajjeb il-ganċ. Ifforma l-għaġina f’ forma ta’ ballun. Ma tridx iżżid dqiq. Poġġi l-għaġina f’ bieqja u għatti tajjeb b’ sarvetta mxarrba.

6. Jekk qed tagħmel l-għaġina b’idejk; neħħi l-għaġina kollha li jkollok mas-swaba. Ifforma l-għaġina f’ forma ta’ ballun. Ma tridx iżżid dqiq. Poġġi l-għaġina f’ bieqja u għatti tajjeb b’ sarvetta mxarrba.

7. Trid tħalli l-għaġina toqgħod mil-lanqas għal siegħa. Jekk it-temp ikun sħun jew inkella jkollok il-kċina sħuna; allura trid tpoġġiha fil-fridge.

Punti Mportanti

DQIQ Dan irid ikun dejjem plain. Qatt u qatt ma għandu jintuża dqiq self-raising jew inkella żżid il-baking powder. L-għaġina trid tiġi qisha gallettini u mhux qisek qegħda tiekol kejk. Jekk iżżid il-baking powder md-dqiq, ir-riżultat ikun għaġina minfuħa.

MARGARINE Trid tuża margarine l-istess bħal dik li tintuża għal-kejkijiet. Dik il-margarine ratba li tinsab fi skutelli ma hijiex tajba biex tagħmel l-għaġina.

MISTRIEĦ Importanti ħafna li l-għaġina tistrieħ għal ftit ħin wara li tkun ffurmajtha f’ forma ta’ ballun (dough) Jekk ma tagħmilx hekk tibda titfarrak.

IŻŻIDX DQIQ Meta l-għaġina tkun lesta ġieli ninnutaw li din tkun ratba, u allura nibdew inżidu aktar dqiq. MA TRIDX IŻŻID XEJN. Ħalli l-għaġina tistrieħ u meta tiġi biex tużaha, tara kif l-għaġina tkun tajba. Jekk iżżidu ħafna dqiq l-għaġina tiġi xotta u tinqasam meta tiftaħa.

FIL-FRIDGE Tista tagħmel l-għaġina u tħalliha fil-fridge minn 2 sa 3 ġranet qabel tużaha.

FRIŻA Tista tiffriża l-għaġina. Meta tagħmel hekk trid tpoġġi tabella bl-isem u bid-data, fuq kull borża. Tħallix l-għaġina għal aktar minn 4 ġimgħat.

Wara li jkun għadda żmien ta’ mhux anqas minn siegħa, tista’ anke tkun minn ta’ jiem qabel, ibda lesti biex tiftaħ l-għaġina. Ara x’ dixx se tuża jekk se tagħmel torta jew inkella cutters jekk se tagħmel affarijiet oħra.

Aqta biċċa għaġina li taħseb li se jkollok bżonn għar-riċetta li tkun se tagħmel. Ħaddem ftit b’ idejk biex tirtab u għamel forma ta’ ballun. Roxx ftit dqiq fuq il-mejda. Trid tagħmel ħafna attenzjoni biex ma tagħmilx ħafna. Dan għaliex inkella l-għaġina tiġi iebsa. Poġġi l-għaġina fin-nofs u għafas b’ idejk l-isfel Roxx ftit dqiq fuq l-għaġina u bil-lembuba ibda iftaħ. Importanti li meta tkun qed tiftaħ trid dejjem iċċaqlaq l-għaġina biex din ma teħilx la mal-mejda u lanqas mal-lembuba.

L-għaġina m’ għandix tkun ħoxna ħafna imma lanqas irqiqa. Trid tiftaħ biżżejjed kemm ikollok bżonn. Idlek id-dixx li tkun se tuża. Dawwar l-għaġina fuq il-lembuba u ifrex fuq il-forma Jekk se tagħmel affarijiet żgħar allura aqta bil-forom.

Iġbor flimkien l-għaġina żejda li jkun fadallek. Kemm tista neħħi d-dqiq zejjed li jkun hemm fuq l-għaġina. Dan biex ma tixxutax u tibbies. Dawwarhom ma’ għaġina ġdida u erġa uża BISS kemm ikollok bżonn.

Jekk jista jkun trid dejjem tħalli l-għaġina mgħottija b’xi sarvetta umda sabiex ma tinxifx.

400g salamun
100g gambli
200g kurrad
150g karotti
150g brokkoli
150g ful imqaxxar
150g piżelli
50g margarine
50g dqiq
600ml ilma
dada tal-ħut
tewm
ħabaq
lumija

Metodu

1. Aħsel, qaxxar u qatta l-ħaxix kollu. Qiegħed il-ħaxix fi bwieqi differenti. Il-ħut ukoll qattgħu f’biċċiet kwadri.

2. Ġo taġen kbir saħħan il-margarine. Qalli l-kurrad u t-tewm. Ħawwad tajjeb. Żid il-karotti u kompli sajjar dejjem fuq nar baxx, filwaqt li tkompli tħawwad.

3. Żid is-salamun u l-qoxra ta’ lumija. Ħawwad tajjeb u kompli sajjar għal ħames minuti.

4. Żid id-dqiq, l-ilma, il-ħabaq u d-dada tal-ħut. Kompli ħawwad sakemm it-taħlita tiftaħ tagħli.

5. Żid il-brokkoli, il-piżelli u l-ful. Erġa ħawwad u żid ftit bżar u melħ.

6. B’din it-taħlita tista tagħmel jew torta kbira jew inkella torti żgħar individwali. Tista tużaw l-għaġina li tħobbu jew għaġina frolla (shortcrust) jew għaġina sfoll (puff pastry). Tista wkoll tagħmel il-qiegħ ta’ l-għaġina u l-wiċċ tal-patata maxx.

7. Idlek il-wiċċ bil-bajd imħabbat u jekk trid tista troxx ftit ġunġlien fil-wiċċ ta’ l-għaġina.

8. Sajjar fil-forn.

Ingredjenti

Filo pastry
Bżar aħdar
Bżaru aħmar
100g kurrad
60g karrotti
40g basal
cherry tomatoes
50g faqqieħ
Ħabaq
Bżar u melħ

Metodu

Aqta 7 biċċiet tal-għaġina ta’ daqs 16cmx16cm il-waħda. Triq tagħmel ħafna attenzjoni int u taqbad din l-għaġina għax malajr tinkiser.

Idlek il-folji bil-butir u poġġi folja waħda kontra l-oħra biex tifforma diversi ponot. L-aħjar biex tidlek hu li ddewweb il-butir u ddellek bil-pinzell. B’hekk tkun żgur li l-għaġina ma tinkisirx.

Qiegħed kull biċċa ta’ l-għaġina ġo forma tal-forn. Jekk ma jkollokx forom tal-metall jew ċaqquf tad-daqs li trid, tista tuża tal-foil.

Sajjar ġo forn moderat għal madwar 20 minuta. Meta jkunu lesti hallihom jiksħu sew qabel ma tneħħihom mill-forma.

Qatta l-ħaxix kollu f’ biċċiet tawwalin.

Ġo taġen kbir saħħan ftit żejt taż-żebbuġa. Meta jkun saħan sew qalli malajr il-ħaxix.

Żid il-ħabaq. Roxx ftit bżar u melħ. Ħawwad tajjeb.

Aħsel it-tadam u żidu sħiħ ma’ din it-taħlita.

Imla l-forom ta’ l-għaġina b’dan il-ħaxix.

Ingredjenti

Brunġiela
Tewm
Meraq tal-lumi
Żejt taż-żebbuġa
Tursin imqatta rqiq
Żewġ imgħaref youghurt abjad

Metodu

Aqsam il-brunġiela min nofs, fellel u daħħal fil-forn sakemm issir u tirtab.

Meta tkun lesta ħaffer sewwa b’imgharfa u ħalliha tiksaħ sewwa.

Poġġi ġo blender, flimkien mat-tewm, meraq tal-lumi, żejt, bżar u melħ. Ħaddem sewwa.

Neħħi t-taħlita u qegħda fil-bieqja li tkun se sservi fiha. Żid il-youghurt u roxx it tursin fil wiċċ. Zid ftit tadam imqatt kwadri,zejjen bil kappar

Servi bil-galletti, ħobż mixwi u pitta sħuna.

Ingredjenti

Salamun
Gambli kbar
Ħuta bajda , bħal aċċola jew ċerna
Tursin
Żejt taż-żebbuġa. Jekk jista jkun extra virgin.
Melħ u bżar
Lumi

Metodu

Fuq platt kbir qiegħed il-biċċiet tas-salamun u l-ħuta l-bajda. Il-biċċiet tal-ħut ma jridux ikunu kbar. Trid tagħmel attenzjoni kbira li ma jkollhomx xewk.

Lesti dixx tal-forn fejn se ssajar il-ħut.

Fil-qiegħ tad-dixx poġġi s-salamun fuqu l-ħuta l-bajda u l-aħħar il-gamblu mqaxxar. Fil-wiċċ roxx ftit bżar u melħ, meraq tal-lumi u żejt taż-żebbuġa.

Sajjar fil-forn għal madwar 25 minuta.

Servi bil-flieli tal-lumi.

KIF TAGĦMEL L-GĦAĠINA

Ingredjenti

235ml ilma fietel
350g dqiq plain
1.25 kuċċarina ħmira
2 imgħaref żejt taż-żebbuġa
kuċċarina melħ
kuċċarina zokkor

Metodu

Ġo bieqja żgħira qiegħed il-ħmira u kuċċarina zokkor. Ħallat tajjeb. Ferra l-ilma fietel u ħawwad. Qiegħed fil ġenb, sakemm it-taħlita tikber u fil-wiċċ ikollha r-ragħwa.

Ġo beiqja kbira għarbel id-dqiq. Żid il-melħ u ħallat tajjeb.

Mad-dqiq żid it-taħlita tal-ħmira flimkien maż-żejt. Għaġen sewwa sakemm l-għaġina tiġi lixxa (smooth). Ifforma l-għaġina f’forma ta’ ballun. Erġa qiegħed ġo l-iskutella. Għatti b’ċarruta mxarrba u ħalliha f’post sħun għal madwar sagħtejn jew sakemm tara li t-taħlita telgħet id-doppju.

Ferrex ftit dqiq fuq il-mejda fejn tkun se taħdem l-għaġina. Ħaddem b’idejk u erġa poggi l-għaġina fl-iskutella sakemm terġa titla. Erġa għatti b’ċarruta mxarrba u ħalliha f’post sħun.

Din id-darba tinduna kemm l-għaġina tieħu wisq anqas żmien biex terġa titla. B’hekk l-għaġina ma jkolliex ħafna tomgħa ta’ ħmira.

Jekk se tiffriża l-għaġina poġġiha ġo borża tal-plastic; issikka l-isfel u ffriża għal mhux aktar minn tliet xhur.

KIF TIBDA L-PIZZA

Jekk se tagħmel il-pizza f’forom żgħar u tondi jew pizza magħluqa (calzone) allura aqta biċċet mill-għaġina u fforma fi blalen żgħar. Tista tagħmel hekk anki qabel ma tiffriża l-għaġina; u b’hekk issibha lesta meta tkun tridha. Iftaħ b’idejk jew bil-lembuba.

ZALZA

Din għandha tkun zalza tat-tadam komuni. Iġifieri tadam biss mingħajr xejn miżjud. Tista tuża passato tal-flixkun. Ma trid tagħmel ħafna kunserva.

Mozzarella

Importanti li l-mozzarella tkun imqatta biċċiet żgħar ħafna jew irqaq. Inkella din tieħu ħafna żmien biex iddub. L-aħjar ħaġa hu li tuża l-imħakka minn-naħa ta’ fejn hi l-iħxen.

Pizza Magħluqa

Tista tagħmel din it-tip ta’ pizza, dik li t-Taljani jgħidulha Calzone. Din hija tajba ħafna u tista tuża l-imaġinazzjoni u l-l-gosti tiegħek u tal-familja fl-għażla ta’ l-ingredjenti. Dawn huma ftit eżempji kif tista timla l-pizza:

Irkotta ,spinaċi u mozzarella.
Mozzarella, perżut u faqqiegħ.
Mozzarella, spinaċi u ħut li trid; bħal lampuki, tonn taż-żejt etc.
Mozzarella, tiġieġ, faqqiegħ, spinaċi u għasel.

Pizza Tradizzjonali

Il-pizza tradizzjonali hija dik ċatta. Hija ferm diffiċli li meta sajjarha fil-forn tad-dar ikollha l-istess togħma bħal dik li nieklu minn barra. Dan għaliex biex issajjar il pizza tradizzjonali trid il-qiegħa u mhux pjanċa tal-forn tad-djar.

Veġetarjana

Qarabagħli, brunġiel, sweetcorn, piżelli, basal, zalza u mozzarella.

Quattro formaggi bl-Aruka u Perżut Taljan (Parma Ham)

4 tipi differenti ta’ ġobon: Gruyère, Fontina, Mozzarella u Blue Cheese, aruka u slices tal-perżut.

Pizza tan-Nanna

Ingredjenti

400g irkotta
600g patata mqatta rqiqa ħafna Crisps
120g basal imqatta rqiq
80g qlub tal qaqoċċ
ftit bużbież
slices tat-tadam
sinna tewm
bżar u melħ
zalza
mozzarella
ftit ħalib
riegnu

Metodu

Għamel l-għaġina tal-pizza u iftaħ skont id-daqs li trid. Poġġiha fuq pjanċa tal-forn.

Ġo bieqja qiegħed l-irkotta u għaffiġha. Żid magħha ftit ħalib u bżar u melħ.

Qiegħed ftit zalza fuq l-għaġina.

Fuq din iz-zalza għamel it-taħlita ta’ l-irkotta flimkien ma’ ftit mozzarella.

Ġo bieqja kbira poġġi l-patata, il-basal, il-qlub tal-qaqoċċ, bużbież, riegnu u nofs il-mozzarella li jkun baqa. Ħallat tajjeb.

Qiegħed din it-taħlita fuq l-irkotta. Żejjen il-wiċċ bil-bqija tal-mozzarella u s-slices tat-tadam.

Sajjar f’forn jahraq. Jekk trid meta toħroġ mill-forn ferrex ftit żejt taż-żebbuġa.

(Din ir-riċetta tal-pizza hija oriġinali ta’ Anton B. Dougall)

Ingredjenti
għaġina tat-torti
600ml ħalib
4 bajdiet
bżar u melħ
60g ġobon tat-toqba
60g pancetta jew bacon
Metodu

1. Idlek dixx tal-flan u iftaħ l-għaġina.

2. Ġo taġen qalli ftit il-pancetta. Ferrixha fuq il-qiegħ ta’ l-għaġina.

3. Fuqha poġġi biċċiet żgħar tal-ġobon.

4. Ġo bieqja qiegħed il-ħalib u l-bajd, il-bżar u l-melħ. Ħallat tajjeb flimkien u ferrex din it-taħlita fuq il-ġobon. It-torta trid tintela b’ din it-taħlita. Jekk tiggosta fil-wiċċ tista troxx ftit ġunġlien.

5. Sajjar fil-forn 1800C Gas Numru 4-5 għal madwar 40 minuta.

NOTI

Tista tagħmel tipi ta’ quiches żgħar.

Il- varjazzjonijiet biex timla l-quiche huma kbar u tista tuża l-imaġinazzjoni tiegħek. Dawn huma ftit eżempji:

Asparagus

Tadam bil-mustarda

Il-ħaxix kollu huwa tajjeb

Gobnijiet differenti

Avocado

Tonn taż-żejt

Ingredjenti

420g dqiq plain
180g margarine
112g ilma
ftit melħ

Metodu

1. Ġo bieqja għarbel id dqiq.

2. Żid miegħu l-margarine u ħaddem tajjeb sakemm it-taħlita tiġi qisha ramel. Żifd il-melħ u erġa ħawwad.

3. Żid l-ilma u għagen f’għaġina. Ma tridx iżżid l-ilma f’ daqqa; għax jista jkun li jkollok bżonn anqas. Dan jiddependi sew mid-dqiq kif ukoll mis-sħana li jkun hemm fil-kċina int u tagħmel l-għaġina.

4. Għatti bl-istretch and seal u ħalliha toqgħod għal mhux anqas minn siegħa. Jekk tkun ħafna sħana jew inkella l-kċina tkun sħuna trid tqiegħed l-għaġina fil-fridge.